earlybirdo

قوود ايرلي مورننق ليديز اند جنز.. واخيرا ويك اند! 

حلو الواحد يعلق على اغنية طول الويك اند .. والاحلى يعلق على مثل شعبي ويخليه مثل الترجية بأذون الليديز والمسباح بيمين الجنز (جنتس ولا تزعلون).. اليوم باشاركم بمثل واغنية

ترا كلام الليل مدهون بزبدة ترا

الى من ينطبق عليهم هذا المثل المأثور..  لا يكون واياكم وحذاري مواعدة عيالكم بكلام لستم بقده بليلة اليمعة..  حدكم معاهم تصبحون على خير.. واذا سألوكم وين بنروح باجر؟ قولوهم تونا مصلين الشفع والوتر ويستحسن الواحد ما يكثر بالحجي بعد الوتر.. يصير خير باجر

الخميس اللي طاف غلطت وواعدتهم بريوق بمكدونالدز.. وكالعادة نمت قبلهم من التعب

 قعدت من غرقة نومي على صوت تطربق ريول مع هزتين عالجتف.. فجيت عيوني على بحيرة وجبل اخضر قمته بيضاء وريحة بلوبيري مفن تفوتح بالصالة.. يا سلام لو يحصل جان كل ليلة اواعد عيالي.. نرجع للواقع وكشة بيكا اللي صبحت فيها

ماما طلعت الشمس وصار الصبح

ماشاالله  شهالتقرير العامر بالمرادفات.. ومتى اعلى مد وادنى جزر

انتي قلتي بتودينا نتريق بماكدونالدز

ادري اذا ما قمت بالطيب بيقعدون البرغوت الصغير تلج البيت لج.. زائد اني ما ابيهم اذا كبروا يصير عندهم ارتباط شرطي بيني وبين المثل ويطلعون معقدين

 الام الرؤوم حق هالجيل اهي الأم اللي تفي بوعودها ولازم تسوي داون لود حق ألعاب الآي بود اللي ابلاش ومو بلاش.. والام اللي ما تتابع ابل ستور وما تسوي اب ديت حق العاب عيالها اول بأول، ما تستحق ان تكون ام

فوضت امري للفتاح العليم والجيب ولله الحمد فيه دنانير تشتري بريكفاست ميل.. بس المزاج مش رايق ولا كريم.. باب الامل بابك يا رحيم

من وين ايي المزاج وعبيد موصل اي بوده بمسجلة السيارة واغنية المصارع زاك رايدر وين اللي ما يسمعها وبنفس الوقت قاعد يلعب لعبة فروت نينجا.. يعني اغنية هيفي ميتل وفوقها صوت اللعبة بالسيارة

يا عبيد يهديك يرضيك غير الاغنية  حط لنا شي للريس متقال (مزرقة اغاني حقي بآي بوده).. ما رضا ومصر على اغاني المصارعين مع ذكر السيرة الذاتية لكل مصارع.. انا شكو اعرف ان ابو زاك رايدر كان مصارع! وان راندي اورتن يصيد فايبرز  وجون سينا يمثل مادري كان بالجيش.. الولد عبارة عن ويكيبيديا مصارعين.. الحمدلله اني وصلت مكدونالدز قبل السبع وقبل لا تبلش اغنية ترِبل اتش تايم تو بلاي ذا قييييييم

كل واحد طلبله بان كيك ميل مع اكسترا ميبل سيرب وحاولوا يبدلون عصير البرتقال الحامض بفانتا اورنج بس ما عوزهم.. اخير ما كلوا الا ربع بانكيكة

ايا شقول! مقعديني قبل طير الوروار علشان تاكلون ربع بانكيكة! لو الكرتونة مالت الميل تنوكل جان خليتكم تاكلونها.. انتو خبزة لبنانية وتخب عليكم يا عيال شربت.. الشرهة علي اللي طعتكم

احتريت وقلت اروح اقند الراس عند امي.. يوم وصلت عندها تمت فترة تشبهر ببلوزتي

يا حافظ يمه شدعوة! عليج نظرات تكرهني بعمري.. ما فيها شي البلوزة شحيث انج كنتي معاي يوم اشتريها 

وانا اطالع بلوزتي اكتشفت اني كنت لابستها بالمقلوب.. وموديل التاغ شبر على كتر

):

تصدقين عاد يمه! من زمان ودي اقول جملة لقد طفح الكيل..  ازيدج من التسبه بيت.. ذاك اليوم مداومة بكرت ماجك بلانت  بدال كرت الدوام

يالله بعد الواحد شيقول.. كل ربع بان كيك بتعلوم.. والدرس المستفاد اني ما اواعد عيالي الا وانا بكامل قواي العقلية.. يعني قبل اذان المغرب بساعة.. بالضبط لما شمس الاصيل تذهّب خوص النخيل

ما راح اطلع مبجر بالويك اند حتى لو فازعة من الفير

البلايز الرِّفيرسِبل ممتازة لمن يعاني من النسيان والشرود الذهني

 وعلى طاري الشرود الذهني.. ماله داعي يصير في كروت وباسوردز حق الدوامات بشكل خاص وحق كل شكو ماكو بشكل عام.. شهالدوامات اللي ندشها بكروت وارقام سرية! بعد لو عايشين بسان فرانسسكو جان قلنا امن ومحاكم.. بس المرقاب دِسترِكت راس مالها اغنية تقزر علينا  الذهاب والإياب