عشرة غيغا في البلكونة

ملل ملاقة ماكو شغل

الواي فاي منقطع من البيت.. اي شي يتعطل بالبيت يتصلح بعد شهر مع الحنة المستمرة على مستر شربت.. تذكرت ابراهيم الشرقاوي المشهور بسناء اخت القمر بفيلم خلف اسوار الجامعة.. شلون كان يطفر من انقطاع الماي عن شقته اللي بالسطوح مادري البدرون والصابون ترس راسه وويهه.. شكلكم ما عندكم فكرة لا عن الفيلم ولا عن الممثل ولا عن البدرون

المهم اني كنت متضايقة في البداية.. بس لما تذكرت بلوة سناء اخت القمر هانت علي بلوتي ويازلي الوضع الحين.. قاعدة اسوي اشياء مستحيل اسويها مع وجود مخفي الصوت والصورة

الخميس اللي طاف طلعت من الدوام وتغديت فبيت الاهل "مديم اسويها".. وليش ان عندهم واي فاي ما طلعت منهم الا عقب اذان العشاء.. زوارة جناين قبل على قولة امي.. الضفدعة الكبيرة "بيكا"  كانت تبي تنام عند يدتها  والعُبُد يبي عيال خالته.. وزعتهم بالتساوي واحتفظت بالبرغوت الصغيّر "نونو".. وفي ليلة الجمعة يفتقد الانترنت.. يعني ما ردنا حق صندوق دنيا باناسونك

فجّيت التلفزيون اللي ما ادري عنه وقعدت اقلّب بالقنوات.. نونو اندمجت بلعبة السنوكر وأصرّت إلحاحًا على عدم تغيير المحطة الرياضية

 جانها فهمت شي انا فهمت.. بس كنت مستانسة على كل من العبارات التشجيعية الآتية الصادرة منها "قووول برابووه اللله اديييب يعني عجيب"

وبعدين خابرة الكُوَرْ كانوا حُمُرْ.. شدخّل اللون الوردي والازرق فيهم! بس لاحظت شغلة مهمة.. كل ما قوّلوا بالوردي او الازرق يردها واحد وسواسي ملقوف لابس دسوس بيضة ويحطها بنص الطاولة.. عاد مادري تنحسب للمتسابق والا عليه!.. الوسواسي ابخص

 انا حدي مع البلياردو العادية وما اكوّن الكور الا بالاستعانة بإكستنشن علاليق المهارة

 الصالة كان متعوب عليها.. زولية بنفسجة وفوقها طاولة السنوكر بكُوَرها والكشافات بالسقف اكثر من كشافات نادي كاظمة.. غير الكراسي اليلد اللي يرتاح عليها اللاعبين لين اييهم الدور

في واحد نسخة من مستر بن اسمه ستيفنز.. ما قعد على حيله وفاز بظرف ٢٨ دقيقة.. انزين احفظ ماء وجه المنافس وارأف بحاله خلّه يلعب لو مرة.. الكور مهي طايرة

هذي كانت سهرة الخميس.. ونام بكير وفيق بكير وشوف الويك اند هم بيطير.. النهار كله بركة.. شفت فيلمين بصباح يوم السبت

حفلة الست لي الثمان كانت مع فيلم مين فينا الحرامي من تمثيل عادل امام وشيريهان وعلي الشريف

ومن الثمان لي العشر فيلم ماي نيم از خان من تمثيل ذا ون اند اونلي شاروخان

ومن ١١ لين الواحدة بعد الظهر اتسوّق بدكاكين الافنيوز.. في محلات بالافنيوز تشرح القلب واذا شريت شي وييت بتحاسب تشوف سنع البياعين بتلبّق الهدوم بالجياس.. وفي محلات اعوذ بالله ودي السّبهم بالعلاق.. يسلفطون الهدوم تسلفط.. جني طارة منهم

شفتوا الانجاز وين يوصل بدون الانترنت!.. بس ليلحين حارني برود مستر شربت.. شكلي براهنه بعشرة كوتشينة مقابل واي فاي عشرة غيغا.. يلعبها بالديوانية طبعا مو معاي وان شاالله يخسر واكسب الرهان وما يصير الخميس الياي الا واصل الانترنت حق بيتي والماي حق شقة اخت القمر.. بين العباد حُسنه اشتهر!

توني ادل التشكيل بكمبيوتري وشكلي بادبل جبودكم بهالسالفة!