كل شي فيه شيرة نسويله شهر

مرحبن ومساء الخير جميعا, كيف الحال والأحوال؟ ماني عارفة سنع السؤال عن الحال والأحوال! والا بس انا اللي استخدم هالجملة الدايخة!

تقريبا مر اسبوع ونيف على الذكرى العشرين من الضربة الجوية, الربع هايضين بالفيس بوك من الأحد اللي طاف... واخزياه يمكن بس انا اللي ما كتبت ستاتس ولا عايدتهم عالمنحة... قلت اكشخ عليهم ببلوقي واتشكر من طويل العمر ولو انها متأخرة ... كثر الله خيره وعساه ذخرنا من بعد الله

F

L

I

G

H

T

على طاري الحال والأحوال... المطاطير صايرين ولا ابيزة, شكل بدون مضمون

مرتين اسخن القهوة واردها بالمطارة

على اني اقعد خمس دقايق على ما اشرب الجاي او القهوة على ما يبردون... بس ما احب اول ما اصبهم يكونون باردين

يا حلو جاي السماور, اي نوع جاي يصير ناطع فيه, حتى لو كان جاي ثلاث تسعات... والاحلى جاي قوري كبر جف اليني وتحته ستمية بيز, كثر ما تصب منه ما يخلص

مادري من وين دخلت علينا سالفة المطارة!

يمكن من السعودية! في محل بمركز مكة كل اييبون منه صوايغ استكانات ومطاطير, وطفى حسه عقب ما فتح المعلم بالكويت لأن قام اييب مثله

بس هم قبل المعلم كنا نييب مطاطير من فياصل, هذا عاد عقدتي اللي ما راح تنحل, عندي مشكلة ازلية معاه, كثر ما اروح له هم اضيعه وما ادله, احسن طريج حقه... الدخلة من طريج فحيحيل صوب مستشفى الهادي وبعدين عاد يشتغل التليفون حق اي خبير فياصلي يدليني وين مكانه بالضبط, عاد انا مو غشيمة ونوخذتي سليمة... بس مادري ليش السليمة تصكني عند فياصل بشكل خاص والجابرية بشكل عام... لو يفتح له فرع بالافنيوز الفيز الثاني اكون ممتنة... هم راح اضيعه وراح استعين بصديق

على طاري الأفنيوز... اليوم ما داومت, قمت على الست والا برد موت, استعسرت وقلت ما راح اداوم الا اذا فجيت ريجي بمرقوقة, يوم شفت استحالة المرقوقة سحبتها نومة لي العشر مع الأطافيل

والله فشلة! شكتب اسباب الغياب! بردانة وارجو احتسابها اجازة طارئة!

اكيد المدير بيحط السبب غير مقبول وارجو احتسابها انقطاع عن العمل

عساك ما تذوق المرقوقة... وانشاالله تقزر الشتا بتبولة ومشخول بايت, لين تحس بالبرد اللي مكسرني ومخليني راكة السبع ركات

عاد ركة من ركة, هذي قعدتي فبيت اهلي من الغدا, ما غير اسخن بالقهوة ومجابلة تمر يايبينه من حفر الباطن, والله يسوى العنوة, غير نمونة طعمه مع هردة الوطن

البيت صاير نقعة مو بس يا بحر... مستر شربت حقرني وشغل الدفايات... الدفاية الوحيدة اللي ما تصدعني ام ثلاث شموع اللي تفتر على ثلاث اتجاهات... ام ليت برتقالي... مجابلتها طول الليل جني مجوسية استغفرالله

على طاري الدفاية... اخيرا نورية تكرمت علينا ومشت عن عمر"ن" يناهز السنة وشهر وتسعة ايام... عقبال ما تمشي حق بيت عدلها عن عمرن يناهز الثامنة عشر قولوا آمين... هذا حدي مع بناتي

ولأن كل شي فيه شيرة نسويله شهر... قررنا بهالمناسبة السعيدة نكت عليها نون يوم اليمعة الياي عقب صلاة العصر بصالة مبارك الحساوي

الدعوة عامة وكل واحد اييب جيسه وحلاوه وخردته... انصح بارتداء الخوذة

كفاية لوية لحد كدة وليلة مبروكة

هوامشز

FLIGHT= قفزة عن موضوع الساعة هذا اذا حالفكم الحظ وشفتو موضوع من الاساس او اي ترابط بالمواضيع

مديري عين السيح وما ارضى عليه حتى لو يصكني انقطاع عن العمل, والتبولة مفيدة للمشخول

ودي استثمر ألفي بمشروع ورد وكب كيك... تدرون فبراير عالابواب ويكثر الطلب على الورد والكب كيك... يا عسى ايامكم عامرة بالفرح

صالة مبارك الحساوي تحت الترميم حاليا

:p