الاثنين، 29 نوفمبر، 2010

حالة البحر

دايما المود الصبح يكون اعلى مد, استغرب من الناس اللي ما ينتحاجون بهالحزة ويبيلهم ساعتين زمن يالله اتجرأ واصبح عليهم, مو ناقصهم غير يرزون اعلام حالة البحر على مكتبهم, طبعا علمهم دايما احمر وعالضحى العود تروق الغزالة ويصير اصفر


ثلاث اشياء اهي سر المد العالي والعلم الأخضر

الغسالة

ودي احطلي شزلونغ وواي فاي ومطبخ تحضيري بغرفة الغسيل, ويزوروني اليهال وابوهم بالويك-اند

وايد احب السطح واذا ما غسلت الهدوم قبل لا اطلع اتشاءم من يومي

مكالمات الصباح والقهوة

لازم اتحرش بامي الصبح بطريجي حق الدوام, منها ابر والديني وأسأل عن حالها وغداها واذا في مجال تدزلي كبة يريش بماعون فخار
شالفرق بين البايركس والفخار؟


اخلص من امي تستلمني اختي تقولي لحقي مطلعة 12 كولكتبلز -شي خاص بالفارم فل-
she made my day

اخلص من اختي تستلمني بنت العمة
تشتكيلي من بنتها, تقول ماخذة من بوكها خمس دنانير حق المدرسة وقاصة عليها وقايلتلها بس ماخذة دينار

اتحلطم على سبيج, كل يوم تحرق دمي على جاكيت ما تبي تلبسه واتحلف فيها تحلف ما تفصخه لو تنطبخ من الحر

تمللت وقمت اتثاوب من سوالفنا اللي تصب في مجرى ارذل العمر مو بس منتصف العمر
عورني قلبي لما تذكرت بروينا اللي مر عليه اكثر من ثلاثين سنة.. شلون السنين طوت وخلتنا نتجابل ونحش بفلذات اكبادنا.. الله يستر عقب ثلاثين سنة بنتجابل ونحش بمنو! اكيد بفلذات ركبنا ... وحدة تحر الثانية... اكيد بتقولي "اووء اووء بدلت ركبي الثنتين وطلعت من باجي شروره"... راح احتر وما اقدر ارد عليها... مالي الا احش فيها بنيو بوست وراح اسميه "فوبيا الركب" اذا الله عطانا عمر... وبما اني اعاني من فوبيا الركب طلبت تغيير الموضوع بسرعة

غيرت الموضوع من الركب الى شوب-بوب, تقولي اكو بنطلون يلد لازم يكون من نصيبج هالشتا

تعوذت من ابليس وقلت كمنت شسيب سبع مرات بقلبي قبل لا ارد عليها... شلون يعني بنطلون يلد؟ وشلون ينلبس؟ بعدين اذا حالفني الحظ ولبسته منو يضمنلي ان لساني ما ينعوي ويرطن بلغة اهل نورث داكوتا الغرب اوسطية!
المشكلة ان فز قلبي على الفكرة, دعيت ربي يثبت عقلي وما تحوشني لوثة والبس يلد بمنتصف عمري, اصلا ما فتحت على الصفحة, خفت لا يعجبني واشتريه, صايرة وايد خفيفة وكلمة اتييبني وكلمة توديني

ترد تقولي اذا مو قادرة عاليلد لا تطوفين الهنتر بووت والا بتصيرين داثرة هالشتا


هددتها باني بفضحها بفقرة الارصاد الجوية بنغم الصباح اللي برعاية زين... بعلم عليها عيسى رمضان لأنه مستغرب ليش ما يانا مطر وكل ما قربت الغيمة من حدودنا راحت الاراضي السعودية.. عسى الله يرزقهم ويرزقنا


مافيني انطر ثلاثين سنة وبحش فيها اليوم على انغام اغنية
Bole Chudiyan
طايحة بالهندي طيحة قشرة, ذاك اليوم شوقوني السواق الهنود بمواقف الافنيوز, متيمعين عالكرسي والاغاني الهندية شايلة وكل واحد بايده قلاص حليب وجاي,,, كان ودي اكشت باللي مواعدتهم واسطر يمهم!



أميتاب كلماله ويطول! تهقون في ابر تطول بالهند!
ابي اروح الهند براس السنة واعيش على راس مالاي واقعد بغرفة نايل فيو

يعني شنو اوه سجنجي! وايد يايزتلي


هناك 39 تعليقًا:

aL-NooR . يقول...

يا حلو طقوسج اليومية
تصدقين ..انا من اسافر استانس اقولهم خلو غسار الهدوم علي .. احس متعة ..اتوقعين ليش ؟ و ينيي ولا غسال الماعين الا اذا في دش ووشر الله وكيلج زين ما احط فيها الفوط من الفرحة D:
الصرحة مخترع الغسالات يبيلة جائزة نوبل للسلام ههههه

على طاري البوتس .. توه توه داقة على اختي الصغيرة مشتطة..النور طلبيلي الحين هانتر بس توري بيرج .. قتلها شمالله من كثر المطر اللي عندنا .. احنا هالهانتز من لبسناهم قبسنا على الوضع و هالمطر مو ياينا..حسبي الله عليها من هبه ..


شنو هالبنطرون ( بمعجم النور يعني بنطلون ) اليلد صدقيني بكون حلو عليج ترى .. لا تستسلمين حق العمر
هههههههه و انا معاج ..و بيكة و النور ..فريق ههه

الزين يقول...

ههههههههههههه


يازينج زيناه
ضحكتيني وانا محتاجه اضحك

يعل ايامج السعد والبخت يمج قعد

:**

الليوان يقول...

يغربل بليسج...
شنو هذا ليش يعني حاطة وحدة تطامر وبطنها يمال العافية ما كو بطن...
حريتيني :(

ابي اروح الهند اذا في ابر تطول
؛)

بعدين بنت عمتج ما عندها سالفة...حقريها بس..آل بنطرون يلد آل

وبيني وبينج مواعين الفخار لهم طعم حلو بالطباخ...

وقولي آمين...عسى صباحاتج كلها خضرا
وعلمها عالي بعد ..

:***

t7l6m.com يقول...

عاش التفاؤل الصباحي ومتلازمته غسيل الهدوم والله يخليلج الوالدة ويعطيك وياها الصحه والعافيه
وبإستثناء الركب،الله يكافي الجميع الشر
ما أقدر أعلق على الجاي حليب أو طول اميتاب

chandal/danchal!! يقول...

اهلا بالنور يسعد صباحك
:)

اشترك معاج بسالفة الغسالة بالسفر وهم غسال المواعين غرامي, ترى الدش وشر لازم تغسلين الماعون قبل لا تحطينه فيه.. احبه لأنه معقم والمواعين تطلع اتلالي منه
اللي ما اواطنه "الاوتي"

اي والله يستاهل نوبل وقولدن قلوب والاوسكار بعد... ويا ريت يحطون له نجمة بشارع walk of fame

بعلم عليهم لجنة ازالة التعديات, بدل لا يشيلون الخيام خل يشيلون هالبواتة


اشكرج على التشجيع نوري, شحيث اني على طريف واشتريه "يا ملحه"
:)

chandal/danchal!! يقول...

زونزون

صباحك شاي بالقرنفل
:*

ادري غرامج حالة البحر وكملتها بمعشوقتك الهند
:))

تسلمين عالدعوة الحلوة ولج مثلها واكثر يا سككر
:*

chandal/danchal!! يقول...

يا هلا وصباحو ليوان

:)

انا ما شفت الا المقطع مال اميتاب, وايد تكانة رقصه


جان زين تبحبشين لنا بسالفة الابر

وبنت عمتي ما عندها ما عند يدي ولا تزعلين, اهي اللي كاشحتنا بسالفة المطر

chandal/danchal!! يقول...

يا هلا تحلطم, عاش من قال
:)

تسلم على الدعوة ويحفظلك كل غالينك

عاد جايهم لا يعلا عليه, غير نمونة
والطول عز
:)

ARTFUL يقول...

جندله
----------

صباح الخيييير

والله ضحكتيني يا ام عبييييد

D;

الا تشرييين الهدوم ،،على راسي ربة البيت والله انج أصليه

انزين ما تسوين سندويشات فول للعيال

p;

شوفي عاد حلفتج ، ان دزت لج الوالده كبة يريش بفخار تدزين لي نقصه!!

طلبتج اذا كنتي تكرهيني p;

وبعدين اذا انتي خوافه لبسي ليش تلزمين عيالج جاكيت ولوية!!! شمالة!!

-------------------
الله يستر عقب ثلاثين سنة بنتجابل ونحش بمنو
-------------------

بعد ناوية تعيشي ثلاثين سنة زيادة!!

@@

والله وايد!

p;

----------------------
وقلت كمنت شسيب سبع مرات بقلبي
----------------------

هههههههههههههههه الله يغربل ابليسج ،، دليل دثارة واضح وقاطع

D;


ختاما

حليب وجاي والا جاي وحليب؟

p;

I7na 3shagnaha يقول...

ish salfitich

tshofeen bollywood min waray !!

min mita ?

o ba3dian ish hal mazyoon .. b3ithrich tmoreen ib azmat montasaf el 3omor :))

chinhum awnas min ZUMBA

Yara يقول...

قالتها الشحرورة

وعالباساطة ...الباساطة ياعيني عالبساطة...

ميمة السبيت يقول...

** قبل لا انسى ساجن يعني ريلي او حبيبي مع ان وايد فرق بينهم لووول

شوفي انا يايتني حالة التشري و الميك اوفر بس بلجناط بس مو ام الذبان مالتج لا اقل شوي

منو هذا هتلر مادري هنتر سايقكم ؟

والبنطلون اخذيه و حطي فيه بودر و لبسيه و ماعليج شر انشالله و مالج شغل بالعذال اللي اول حرف من اسمهم آ

عيشي الدوراااااااااااااااا

ولاّدة يقول...

في زمن البيوت الخمسمائة متر لم يعد لنا متنفس غير السطح

آخرتها بنصير فتون في مسلسل الحيالة كله بالسطح
:)

الرقص الهندي شوقني وتذكرت إني لحد الآن ما لقيت لي مدربة

احنا عشقناها

تخسى الزومبا عند الرقص الهندي
إذا لقيت مدربة راح أدعوك للانضمام

Engineer A يقول...

هههههههههه


والله مادري شاقول ؟ بوستج ضحكني أضحك الله سنكِ :))

صج استمتعت بقراءة بوستاتج

دوم يارب ممتعتنا :)

I7na 3shagnaha يقول...

Waladah :

yala 3la eedich

;)

الاوركيده يقول...

صباح الورد

الله يكافيج تبديل الركب انشاء الله قولي آمين ، واي جندل مو من صج غسيل الهدوم والصبح !!!

عطيني اغسل الصحون واي شي ثاني اسوي الاغسيل الهدوم وكويهم ما أحبهم :)

شسالفه اليهال مايحبون يلبسون الجاكيت جنه ياكلهم ولا لما ترد وتقولج ماما ترى وايد هوت !!

chandal/danchal!! يقول...

خويل

ناقصني بس دوار صادق واصير فرع من فروع جنرال اليكتريك

عندي هواية تجميع غسالات بعيد الشر عنك وعن السامعين


افا عليك ما طلبت شي, غالي والطلب فخار من عمر افندي
:)


ما انسى برد ممرات المدرسة, يضرب بالخواصر ومالي خلق البخ فيهم بحوادث الاميري تالي الليل, يالله اجابل مزرعتي
:p

حليب وجاي مع ان نسبة الجاي وايد اعلى... تقريبا 3:1
:)

chandal/danchal!! يقول...

ام جنان

صاجة اميتاب ما ينتطالع من زينه

معاكم بالهندي بس خل اوصل ليفل 100 بمزرعتي
:p

chandal/danchal!! يقول...

Yara

آخرتي بصير شحرورة الصفاة

:)

chandal/danchal!! يقول...

ميومتي

تعليقج موتني من الضحك

:)))

والا اوه سجنجي غير عن ريلي!
لوووووووووووووول

انزين انا اقولها حق نوني, يصير والا ما تركب؟

الهنتر بووت -بووت فيه شبه كبير من بواتة التقمبر-

يعني اذا فلسنا من المطر ممكن ينلبس حق التقمبر, واحتمال كبير نفلس من القباقب

الجونسون موجودة وباقي بس اليلد
:)

chandal/danchal!! يقول...

الغالية ولادة

:)))
لا تييبيلي طاري فتون
مسمية الاثيوبية اللي عندي فتون لأني جكيتها تسولف مع مصري خلف اسوار بيتي

ذكرتني بفتون ودسوقي بتاع البيبس, لأني لما سألت اللي معاها اشعندك ياي بيتي قالي اجيبلهم بيبس من الجمعية... شكله حرامي وهذا كان بيوم الهالوين

اما السطح فوضعه غير, حتى لو كان البيت براحات وفدادين يظل السطح له سحر خاص

سعد وصالحة بدرب الزلق
فهمي ومريم بثلاثية نجيب محفوظ
:)

معاكم بالهندي

chandal/danchal!! يقول...

اهلين ابرار اشتقنالك كتير

:)

الامتع مرورك مهندستنا
ولكم باك
:)

chandal/danchal!! يقول...

يا هلا صباح الاوركيد

:)

ما اغسلهم بايدي, بس اسلفطهم بالغسالة


اللي يبط جبدي لما اتييلج وتكون ناسية الجاكيب بالمدرسة!

ARTFUL يقول...

ترا أحد خطّارج غلط علي واتهمني زورا وبهتانا ولا رديتي عليه!!

لو انا مسويها جان كليتيني بقشوري!!

لنا الله!!

p;

صباح الخير

chandal/danchal!! يقول...

خويل

ربنا اللي بيخلص
وانا منشكحة على تعليقها, عاد ميومة شمعة الجلاس

:)

ميمة السبيت يقول...

** بعد عمري والله يا جندولة يا بعد عيني عينج و إهداء هالسونق :


- والنبي لانكيد العوزال و نؤووول اللي ماعمره تآل

chandal/danchal!! يقول...

ميومتي

لوووووووووول

اول مرة اسمع هالسونق

خابرتها يا عوازل فلفلو ما قالي وقلتله
يـــــــا يا عوازل فلفلو

عاشت سامية
:p

Fahad Al Askr يقول...

لا يكون ساكنة بالخيران وتداومين بقصر العدل

شدعوة مشوار الدوام تكلمين فيه أمج وأختج وسبوج وهم تلقين فيه وقت تفكرين شنو بتكتبين عقب 30 سنة

أنا ودي أعلق على البوست مال الركب ..

بنطلون يلد .. مو ناقص إلا تقولين تنورة جينز ومكسي فرنسي وكاريه وبوك كارتير اللي طالع نصه من المخباة الفوقية وقلم فراري مشطوف راسه ونظارة ريبان

لا رسمي مد أيج الله يعين بو مروان أهم شي لا تروحين السطح بروحج وتنسين إنتي وين ويفقدونج

حسافتج يا كويت يقول...

تعوذت من ابليس وقلت كمنت شسيب سبع مرات

لووووووووووووووووووول
يا ربي خف الطينة شلون صايرة

chandal/danchal!! يقول...

بو طخمة

انا سلحفاة بالسيارة واللي ساكن بالخيران يوصل قبلي
واذا السالفة تسوى ومطولة اكملها بالمواقف


ذكرتني بالمنتصر والمعتمد للهدايا
بس ما كان عندي مخباة فوقية, هذا اللي ناقص بعد... اذا لاحق على فرع السالمية ان شاالله بتلحق على بوست الركب
:p

والواي فاي والتحضيري علشان اغني منسية بالسطح

chandal/danchal!! يقول...

الله يسلمك بو الزين ما عليك زود

شكلك كنت من عشاق حصة كمنت شسيب, مو احسن من الآي باد؟

:)

حسافتج يا كويت يقول...

اي والله كمنت شسيب كانت لعبتي

وكنت ارتاح في هالحصه لان مافيها تفكير وسهالات وكان الضحك ماله والي

kal ho na ho يقول...

أنا وحدة مرات أقعد من النوم وأنا أضحك -جيكي أضحك مو أبتسم_..!!؟


طيعني .. درب المرقاب (غاوي)* وشزينه.. طيعيني بس..!؟


.على فكرة اللون الأزرق يجنن -بالجيم القاهرية- يهوس ..!!؟
.
.
ودمتم

chandal/danchal!! يقول...

حسافتج

انا معاك واصلين حق نفس المرحلة

نحب الخداي وندوره بالتفق

عن نفسي, لقيت روحي بالفارم فل "خداي اصلي"

chandal/danchal!! يقول...

الغالية كَل

مرحبا بك في نادي early bird

وعسى الضحكة على مدار الساعة مو بس الصبابيح
:)

تسدئي وتؤمني بالله!
سمعت هالاغنية وانا بربوع المرقاب, وتولعت فيها وانا متولعة خلقة بالمرقاب

ميرسي عالكومبليمو الرقيقة, قلت نغير شوية تضامنا مع الأزرق

GO AZRAG

ARTFUL يقول...

شهاللووون؟؟

!!!

الواحد بصبح بشي زين اول الاسبوع!!!

خلصت الالوان!!

سلة ميوّة يقول...

يامسى الورد والنوير

تدرين..كل ماضاق خلقي ادش مدونتج ادري
فيها شراحة القلب و وساعة الصدر
وكل اللي نحبه :**

ربي يحفظج وكل من تحبين



وياجماااعه البرد اخترع ...جد
ذاك اليوم وحده دشت العياده
يتني رجفة البرد من كثر الي لابسته
والاجز اتقولين بالاسكيمو

وانا بالعياده المكيف على 16! لا واتصبب عرق


بقلبي قلت كلمة عمتي الشهيرة


اتقيييييييييييييي الله:)

مساج الله بكل شي حلو:**

chandal/danchal!! يقول...

خويل

بالعكس شملحه
:p

chandal/danchal!! يقول...

اهلين دوك, عودا حميدا

:)

تسلمين حبيبتي من ذوقح وطيبج
:*

مو نثقل باللبس علشان تخف الريل عنكم شوية
:)

نورتيني وسعيدة بعودتك
:)